حکومەتی تورکیا پڕوپاگەندەیەک لەبارەی ئافرەتانی کوردی ئێزدی ڕەتدەکاتەوە

ئاڤا نیوز

 

ناوەندی بەرەنگاربوونەوەی زانیاریی ناڕاست لە سەرۆکایەتیی تورکیا ئەو پڕوپاگەندانە ڕەتدەکاتەوە کە باس لەوە دەکەن، "ژنانی ئێزدی لە گۆڕەپانێکی شاری ئیدلیبی سووریا، دەستدرێژیان کراوەتە سەر و فرۆشراون"، تورکیا دەڵێت، باوەڕ بە هەڵمەتەکانی ئیسرائیل مەکەن کە ئامانج لێی گۆڕینی ڕای گشتیی جیهانە.

 

چیرۆکی سەرەکی: بڵاوکردنەوەی ئەو ڕوونکردنەوەیە لەکاتێکدایە کە لە بەشێک لە ئەکاونتە ئیسرائیلییەکانەوە دەنگۆی ئەوە بڵاوکراوەتەوە، کە ژمارەیەک ژنی ئێزدیی لە شاری ئیدلیبی سووریا کە ئێستا لەژێر دەسەڵاتی ئەحمەد شەرع دایە، لەناو قەفەسێکدا نمایش کراون و کڕین و فرۆشتنیان پێوەکراوە. 

 

ڕاگەیێنراوی فەرمی: ناوەندی بەرەنگاربوونەوەی زانیاریی ناڕاست لە تورکیا ڕایگەیاندووە، هەندێک وێنە و ڤیدیۆ لە ژمارەیەک ئەکاونتی ئیسرائیلییەوە بڵاوکراونەتەوە، گوایە ئافرەتانی ئێزدی لە سووریا بە جلی سپییەوە نمایش دەکرێن، تەواوی ئەو پڕوپاگەندانە درۆیە و هیچ ڕاستییەکی نییە.

 

پێدراوە ڕاستەکان: دوای بەدواداچوون دەرکەوتووە ئەو ڤیدیۆیانەی کە ئێستا بڵاوکراونەتەوە و بۆ مەبەستێکی دیکە شێوێندراون، مێژووەکەی دەگەڕێتەوە بۆ ساڵی 2013 لە شاری ئەبولمەتامیر لە پارێزگای بوحەیرەی میسر، کە لەمیانەی خۆپیشاندانێکدا ئەو نمایشەیان کردووە وەکو پشتگیرییەک بۆ محەممەد مورسی، سەرۆککۆماری پێشووی میسر.