نرخی زێڕ دادەبەزێت و هەر ئۆنسەیەک لە 3241 دۆلار جێگیر دەبێت

ئاڤا نیوز

 

مسقاڵێک زێڕی عەیار 21 دادەبەزێت بۆ 670 هەزار دینار و وەبەرهێنەران ئەم دابەزینە بە دەرفەت دەزانن بۆ قازانجی زیاتر.

 

وێنە گەورەکە: نرخی زێر لە هەفتەی ڕابردووەوە دەستیکردووە بە دابەزین و لەسەر ئاستی هەفتانە بۆ هەر ئۆنسەیەک 87 دۆلار دابەزیوە. ئەمە دوای ئەو بەرزبوونەوە خێرا و نائاساییەی لەماوەی سێ مانگی ڕابردوو بەخۆیەوە بینیبوو.

 

ئێستا چی ڕوودەدات: ئێستا نرخی ئۆنسەیەک زێڕ لە بازاڕەکانی کوردستان و جیهان دابەزیوە بۆ 3241 دۆلاری ئەمریکی و هەر مسقاڵێکی عەیارە 21 بە 670 هەزار مامەڵەی پێوە دەکرێت. شارەزایان هۆکاری سەرەکی ئەم دابەزینە دەگەڕێننەوە بۆ فرۆشتن بەمەبەستی قازانج. واتە ئەو وەبەرهێنەر و کڕیارانەی لەماوەی ڕابردوو زێڕیان کریوە و قازانجیان کردووە ئێستا دەیفرۆشن، ئەمەش هۆکارە بۆ دابەزینی زیاتر.

هۆکارە زانراوەکان: بەگشتی ئەو هۆکارانەی دەکرێت فشار بخەنە سەر بەرزبوونەوەی نرخی زێڕ لە هەفتەی داهاتوو بریتین لە:

- ئەگەری فراوانبوونی ناکۆکییەکان و هەڵگیرسانی شەر لەنێوان پاکستان و هیندستان.
- درێژەکێشانی هێرشەکانی ئیسرائیل بۆ سەر سووریا.
- دوورکەوتنەوەی زیاتری نێوان ئەمریکا و ئێران لە دانوستاندنەکان.

ئەو هۆکارانەی وادەکەن نرخی زێڕ زیاتر دابەزێت:

- هەوڵەکان بۆ هێوربوونەوەی شەڕی بازرگانیی نێوان چین و ئەمریکا.
- دەستپێکردنەوەی دانوستاندنەکانی نێوان ئەمریکا و ئێران.
- پرسی ئاگربەست لەنێوان ڕووسیا و ئۆکراینا.

زانیاریی زیاتر: شارەزایانی بازاڕی زێڕ پێیانوایە لە ماوەی کورتخایەن پاڵەپەستۆیەکی زۆر لەسەر نرخی زێڕ هەیە و دابەزینی نرخەکەی ئەگەرێکی کراوەیە. بەڵام لەماوەی مامناوەند و درێژخایەن زێڕ بەردەوام دەبێت لە بەرزبوونەوە و ئەوانەی نیازی وەبەرهێنانی درێژخایەنیان هەیە دەتوانن سوود لەم دابەزینەی ئێستا وەربگرن.