گرژییەکانی نێوان هندستان و پاکستان پەرەدەستێنێت

ئاڤا نیوز

تادێت گرژییەکانی نێوان هندستان و پاکستان پەرە دەسێنێت، تائێستا نزیکەی 60 کەس لەهەردوولا کوژراون، وڵاتانیش داوای ڕاگرتنی هێرشەکانی هەردوو وڵات بۆ سەر یەکتری دەکەن.

چیرۆکی سەرەکی: درەنگانی شەوی چوارشەممە،  شەڕ و پێکدادان  لە نێوان هندستان و پاکستان بەدرێژایی هێڵی سنوورداری هەردوو وڵات لە ناوچەی کشمیر ڕوویدا و تادێت ئاڵۆزییەکانی هەردوو وڵات زیاتر دەبێت.

زانیاری بەدەستهاتوو: ئاژانسی  ڕۆیتەرز بڵاویکردەوە، بەرەبەیانی ئەمڕۆ تەقینەوەیەکی بەهێز لە شاری لاهور لە ڕۆژهەڵاتی پاکستان ڕوویدا تاوەکو ئێستا هۆکاری سەرەکی تەقینەوەکە بڵاونەکراونەتەوە.

زانیاریی زیاتر: بەهۆی شەڕ و پێکدادانی هەردوو وڵات 31 کەس لە لایەنی پاکستان و 12 کەس لە لایەنی هیندستان کوژراون، ئەمەش تووندترین ڕووبەڕووبوونەوەی سەربازیی نێوان هەردوو وڵاتی زلهێزی خاوەن چەکی ئەتۆمییە لە ماوەی دوو دەیەی ڕابردووە.

لێدوانی فەرمی: شهباز شەریف، سەرۆکوەزیرانی پاکستان ڕایگەیاند:  وڵاتەکەی مافی تەواوی هەیە بۆ  وەڵامی ئۆپەراسیۆنە سەربازییەکانی  هیندستان، هاوکات هێرشەکانی ئەو وڵاتەی بە هەڕەشە لەسەر سەروەری و سەقامگیری پاکستان دانا.