لە چاکسازی گەورانی سلێمانی دەمانچە دەبرێتە ژوورەوە

ئاڤا نیوز

لەناو هۆڵێکی زیندانییانی چاکسازیی گەورانی سلێمانی، دەمانچە براوەتە ژوورەوە کە سێ پرسگە و چەندان جۆری ئامێری ئاشکراکردنی بڕیوە و پێیان نەزانیوە. بۆ ئەم بابەتە لیژنە پێکهێنراوە لێکۆڵینەوە دەکرێت.

چیرۆکی سەرەکی: پێنجشەممەی ڕابردوو، دژە تیرۆری یەکێتی زانیاری بەدەستگەیشتووە کە لەناو  هۆڵی سزادراوانی چاکسازیی گەورانی سلێمانی، دەمانچەیەک لە جۆری تۆبلی و پڕ لە فیشەک براوەتە ژوورەوە. دوای ئەوە مەفرەزە دەرەکەن و بەکۆپتەر و ئۆتۆمبێلی سەربازی هەڵدەکوتنە سەر چاکسازییەکە و پشکنین دەکەن و دەمانچەکە دەدۆزنەوە و پێنج کەسیش لەسەر بابەتەکە دەستگیر دەکەن.

زانیاریی تایبەت: ئەو پێنج زیندانییەی دەمانچەکەیان لابووە، یەکێکیان ناوەکەی لەلایەن ئاڤاوە پارێزراوە و  بە پیتی شین دەستپێ دەکات، کەسەکە هەمان ئەوە کەسەیە کە چەند ساڵێک پێشتر مووچەی فەرمانبەرانی نەخۆشخانەی شاری لە سلێمانی دزی. هاوکات پێشتریش کەسێکی کوشتووە و سزای لە سێدارەدانی هەبووە.

یەکێکی دیکە لە دەستگیرکراوان کە ناوی خۆیی و باوکی بە کاف دەستپێدەکات، ئەو کەسە پێشتر باوکی خۆی کوشتووە و سزای 20 ساڵ زیندانی هەیە. ئەوانی تریش  هەموویان کوردن.

هەنگاوی داهاتوو: بڕیارە دژە تیرۆر و ئۆپەراسیۆنی ئاسایشی سلێمانی لە چەند ڕۆژی داهاتوودا ڕاگەیێنراوێک بڵاو بکەنەوە و باسی دەستگیرکردنی ئەم باندە بکەن.

زانیارییە سەرەتاییەکان: بەگوتەی سەرچاوەیەکی ناو چاکسازی گەورانی سلێمانی، بەپێی زانیارییە سەرەتاییەکانیان، ئەم چەکە بۆ ئەوە براوەتە ژوورەوە بۆئەوەی بگات بەدەستی ئەوانەی بەتۆمەتی تیرۆر و کوشتن لە زیندانن، بەڵام نازانرێ بۆ ئەوەیان بووە کە لە ژوورە کەسێک بکوژن، یان بەنیازی ئەوە بوون پلان دابڕێژن و بەم دەمانچەیەوە گێرەشێوێنییەک دروست بکەن و دواتر لە زیندان ڕابکەن.

کاریگەریی و لێکەوتەکان: دەزگا ئەمنییەکانی سلێمانی، نیگەرانی ئەوەن، ئەم دەمانچەیە چۆن ئاوا دزەی کردووەتە ژوورەوە و چۆن سێ پرسگە و ئەو هەموو ئامێرەی ئاشکراکردن و سۆنەر ببڕێت و کەسیش پێی نەزانێت. بۆیە لیژنەیەکی لێکۆڵینەوە پێکهێنراوە.

لەلایەکی دیکەوە: ئیحسان عەبدولڕەحمان، بەڕێوبەری چاکسازییەکانی هەرێمی کوردستان بۆ ئەو بابەتە چووەتە چاکسازی گەورانی سلێمانی و دەڵێت، چۆن دەمانچە بە سێ پرسگە ڕەت بووە و چووەتە ژوورەوە

ئەوەی پێویستە بیزانیت: ئەمە لەکاتێکدایە، تەنیا لەماوەی سێ مانگدا دوو ڕووداوی هەڵهاتنی زیندانیی لەو چاکسازییە هەبووە، یەکێکیان ئەوەبوو کە براکەی خۆی لە جێێ خۆی دانا. ئەوی دیکەیشیان کەسێک بوو کە مۆڵەتی وەرگرتبوو.