عێراق کۆنگرەیەکی نێودەوڵەتیی بۆ پشتیووانیی"قوربانیانی تیرۆر" ساز دەکات

ئاڤا نیوز

 

حکومەتی عێراق بڕیاریداوە کۆنگرەیەکی نێودەوڵەتی بۆ پشتیووانیی "قوربانیانی دەستی تیرۆر" لە بەغدا ساز بکات، تیایدا هەنگاوەکان بۆ پشتیووانیی قوربانییەکان و چۆنیەتی ڕێگری لە سەرهەڵدانەوەی تیرۆر تاوتوێ دەکرێت.

 

وێنە گەورەکە: هێرشی داعش بۆ سەر چەند پارێزگایەکی عێراق لە ساڵی 2014 و کۆنتڕۆڵکردنی بەشێکیان بۆ ماوەی چەندین ساڵ، بووە هۆی گیانلەدەستدان و بێسەروشوێن بوون و لێکدابڕانی هەزاران کەس، هاوکات ئاوارەبوونی ملیۆنانی دیکەش، بەشێکیان تائێستاش زامەکانیان ساڕێژ نەبووە.

 

لێدوانی فەرمی: خەڵەف شنگالی، ڕاوێژکاری سەرۆکوەزیرانی عێراق ڕایگەیاند، کۆنگرەکە بە هاوکاریی ئیسپانیا و نەتەوەیەکگرتووەکان، لە ناوەڕاستی ساڵی 2026 لە بەغدا سازدەکرێت.

 

بۆچی گرنگە: لە کۆنگرەکەدا هەنگاوە یاسایی و حکومییەکان بۆ پشتیووانیی "قوربانیانی دەستی تیرۆر" تاوتوێ دەکرێن، هاوکات گەنجان لەبارەی تاوانەکانی تیرۆر و ئەوەی عێراقییەکان بەسەریان هات هۆشیار دەکرێنەوە، کاریش دەکرێت لەسەر چۆنییەتی ڕێگری لە سەرهەڵدانەوەی داعش و هەر ڕێکخراوێکی دیکەی هاوشێوە لە داهاتوودا.