ئەپیکۆر: خواستمان ئەوەیە دەستبەجێ هەناردەکردنی نەوت دەستپێبکاتەوە

ئاڤا نیوز

 

کۆمەڵەی پیشەسازیی نەوتی هەرێمی کوردستان (ئەپیکۆر) ڕایدەگەیێنێت، خواستی کۆمپانیاکانی بەرهەمهێنەری نەوت ئەوەیە دەستبەجێ نەوتی هەرێمی کورستان لە ڕێگای بۆری نەوتی عێراق-تورکیا (بۆری جەیهان) دەستپێبکاتەوە.

 

وێنە گەورەکە: لە ڕۆژی 25-3-2023ـەوە بەهۆی سکاڵایەکی عێراق لە دادگای ناوبژیوانی پاریس، نەوتی هەرێمی کوردستان بۆ بەندەری جەیهان وەستاوە. ئەگەرچی هەمواری یاسای بودجە کرایەوە و تێچووی نەوتی کۆمپانیاکان بۆ 16 دۆلار بەرز کرایەوە، بەڵام هێشتا کۆمەڵێک گرفت ماون.

ڕاگەیێنراوی فەرمی: کۆمەڵەی پیشەسازیی نەوتی هەرێمی کوردستان (ئەپیکۆر) لە هەژماری خۆیان لە تۆڕی ئێکس ڕایگەیاندووە، ئامادەییان هەیە بۆ هەناردەکردنەوەی نەوتی هەرێمی کوردستان، بەڵام بە مەرجی ئەوەی ڕێککەوتنی نووسراو لەوباریەوە هەبێت. چونکە چەند مانگێکە ڕێککەوتووین لەسەر هەماهەنگی هەناردەکردنەوەی نەوت لە ڕێگەی کۆمپانیای سۆمۆوە. 

 

زانیاریی زیاتر: ئەپیکۆر پێشنیاز دەکات کە کۆمپانیاکان مافی نەوتی خۆیان لە جەیهان وەربگرن، چونکە ئەمە دڵنیایی دەدات هەمووان مافەکانیان بە ڕوونی و بە کارایی لە چوارچێوەی گرێبەستەکان وەردەگرن.

 

ئەوەی پێویستە بیزانیت: ئەم ڕاگەیێنراوەی ئەپیکۆر لە کاتێکدایە چەند ڕۆژێکە شاندێکی تەکنیکی بەغدا لە هەولێرن، بەگوێرەی زانیارییەکانی ئاڤا هەرێمی کوردستان و بەغدا نزیکن لەوەی ڕێککەوتن لەبارەی هەناردەکردنەوەی نەوتی کوردستان و ناردنی مووچەی فەرمانبەران بکەن.