ژووری بازرگانی و پیشەسازی هەولێر بە ڕێژەی 50% بڕیاری لێخۆشبوون بۆ هاوبەشانی دەردەکات

ئاڤا نیوز

ژووری بازرگانی و پیشەسازی هەولێر بەمەبەستی هاوکاریکردنی ئەندامانی، بڕیاری لێخۆشبوونی بە ڕێژەی 50% بۆ سەرجەم هاوبەشانی ژوورەکە دەرکرد.

وێنە گەورەکە: ئەندامانی ژووری بازرگانی ساڵانە دەبێت ناسنامەی ژووری بازرگانی نوێ بکەنەوە و بڕە پارەیەکیان لەبەرامبەردا لێوەردەگیرێت، بەڵام بەهۆی بارودۆخی دارایی بەشێکی زۆر لە هاوبەشانی ناسنامەیان نوێ نەکردۆتەوە و قەرزیان لەسەر کەلەکە بووە، بەو هۆیەوە ژوری بازرگانی هەولێر بڕیاری لێخۆشبوونی ڕاگەیاندووە بۆ ئەوەی ببێتە هاوکار و هەماهەنگ بۆ هاوبەشانی.

لێدوانی فەرمی: کامەران باجگر، جێگری بەرێوەبەری ژووری بازرگانی و پیشەسازی هەولێر، بە ئاڤا میدیای ڕاگەیاند، "بە پێی فەرمانی کارگێڕی ژمارە 79، ئاماژە بە بڕیاری ئەنجوومەنی کارگێڕی ژووری بازرگانی و پیشەسازی هەولێر ژمارە شەش کراوە، لە ڕێکەوتی 2025/6/29، بە کۆی دەنگ بڕیار درا بە لێخۆشبوون بە ڕێژەی 50% بۆ گشت هاوبەشانی ژوورەکەمان".

- بڕیارەکە لە گشت سێکتەرەکان (بازرگانی، دەلالی، پیشەسازی و کۆمپانیا) دەگرێتەوە، بڕیارەکە بۆ ماوەی یەك مانگ لە ڕێکەوتی 2025/7/1 تا 2025/7/31 بەردەوام دەبێت.

- ناسنامەی بازرگانی بە پێی هاوبەشەکە دەگۆڕێت، بازرگانی پلە یەک مانگانە بڕی 110 هەزاری لێوەردەگیرێت، پلە دوو دوو بڕی 90 هەزاری لێوەردەگیرێت، پلە سێ بڕی 60 هەزاری لێوەر دەگێرێت، لەو ڕێژەیەش بازرگان هەیە سێ ملیۆن قەرزبارە و هەیانە کەمتر یان زیاتر.