ئەمساڵ خنکان کەمی کردووە و بەرگریی شارستانیی هەولێریش هۆشداری دەدات

ئاڤا نیوز

بەرگریی شارستانیی هەولێر دەڵێت، بەهۆی بڵاوکردنەوەی ڕێنماییەکان سەبارەت بە مەترسی مەلەکردن لە ڕووبارەکان، شەش مانگی یەکەمی ئەمساڵ بەراورد بە ساڵی ڕابردوو ڕووداوی خنکان کەمی کردووە.

وێنە گەورەکە: لەگەڵ بەرزبوونەوەی پلەکانی گەرما هاونیشتمانیان و گەشتیاران بە مەبەستی گەشت و سەیران ڕوو لە زێی گەورە دەکەن، بۆ سەلامەتی گیانی ئەو کەسانەشی کە دێن بۆ نزیک ڕووبارەکە، بەرگریی شارستانیی هەولێر لە مەترسییەکانی مەلەکردن ئاگاداریان دەکاتەوە.

لێدوانی فەرمی: موقەدەم شاخەوان سەعید، وتەبێژی بەرگری شارستانی هەولێر بە ئاڤای گووت: بە چەندین ڕێگا بەرگریی شارستانیی هەولێر هەوڵی هۆشیارکردنەوەی  هاونیشتمانیان و گەشتیاران دەدات، تاوەکو زیاتر لە مەترسییەکانی ئاوی ڕووبار، و بەنداوەکان تێبگەن و نەبن بە قوربانی.

زانیاریی زیاتر: لە سەرەتای ئەمساڵ تا ئێستا لە سنووری پارێزگای هەولێر، لە ڕووبار و بەنداوەکان 10 کەس خنکاون، هەر بە تەنها 9 کەسیان لە زێی گەورە بوونە، و دانەیەکیشیان لە بەنداوی ئاقوبان خنکاوە، تەمەنی خنکاوەکانیش لەنێوان 9 بۆ 25 ساڵ بووە، لەهەمانکاتدا تیمەکانی بەرگریی شارستانیی هەولێر توانیویانە 20 کەس لە خنکان ڕزگار بکەن، بەو هۆیەشەوە 20 کەس لە تیمەکانی ژێر ئاو بریندار بوونە.

"لە تەواوی ساڵی 2024 لە سنووری پارێزگای هەولێر، 33 کەس خنکاون، ئەم ژمارەیەش بەراورد بە شەش مانگی سەرەتای ئەمساڵ کە تەنها  10 کەسە پێمان دەڵێت، ڕێژەی خنکان بەهۆی بڵاوکردنەوەی هۆشیارییەکان کەمی کردووە".