ئێران: ئەگەر دوو ساڵی بەردەوام هێرش بکەینەوە سەر ئیسرائیل هێشتا هەر مووشەکمان دەمێنێت

ئاڤا نیوز

ڕاوێژکاری سوپای پاسداران ئاشكرای دەکات، هێشتا بەشێکی گەورەی مووشەکە گرنگەکانی وڵاتەکەمان بە دوژمنان نیشان نەداوە.

وێنە گەروەکە: دوای هێرشی 12 ڕۆژەی ئێران و ئیسرائیل بۆسەر یەک هێشتا هەردوولا ئامادەییان تێدایە بۆ هێرشی دیکەو لە میدیاکان وەڵامی یەکدی دەدەنەوە، سوپای پاسداران دەڵێت، لە بچووکترین جووڵە بۆسەرمان گەورەترین وەڵاممان دەبێت.

لێدوانی فەرمی: سەردار جەباری، ڕاوێژکاری سوپای پاسداران ڕایگەیاند، "ژێرخانە مووشەکییەکانمان ئەوەندە گەورەیە کە تا ئێستا زۆرینەی توانای بەرگری وڵاتەکەمان نیشان نەداوە و هێزەکانمان لەوپەڕی ئامادەباشیدان.

ڕاوێژکارەکەی سوپای پاسداران ئەمانەشی وت:

٠ ئەگەر شەڕ لە نێوان ئێمە و ئیسرائیل و ئەمریکا هەڵگیرسێت تەنانەت ئەگەر بۆ ماوەی دوو ساڵ هەموو ڕۆژێک بە مووشەک لێیان بدەین ئەوا سەرچاوەکانمان تەواو نابن.

٠ ئەگەر ئیسرائیل تەنیا جووڵەیەک بکات بەرامبەرمان ئەوکات ئاسمانی وڵاتییان دەکەینە شانۆیەک کە جیهان سەیری بکات.

ئەوەی پێشبینی دەکرێت: سەرەڕای ئەوەی جەنگی نێوان ئێران و ئیسرائیل، ڕاگیرا و  ئاگربەست ڕاگەیێنرا، بەڵام بە وتەی شارەزایان لە ئەگەری شکاندنی ئاگربەست یاخود شکستهێنانی دانوستانە ئەتۆمییەکانی نێوان ئێران و ئەمریکا، ئەگەری دەستپێکردنەوەی جەنگ کراوە دەبێت.