ئێران: داوای دیدارمان لە ئەمریکا نەکردووە

ئاڤا نیوز

وتەبێژی وەزارەتی دەرەوەی ئێران ڕایگەیاند، تاران هیچ داواکارییەکی بۆ دیدار لەگەڵ ئەمریکا نەناردووە سەبارەت بە دانووستان لەبارەی بەرنامە ئەتۆمییەکان.

وێنەگەورەکە: دوای کۆتاییهێنان بە جەنگی 12 ڕۆژەی نێوان ئیسرائیل و ئێران، ئەمریکا چەند جارێک دووپاتی کردووەتەوە کە ئێران ئامادەی دانووستانە و داواشی لە ئەمریکا کردووە کە بۆ ئەم مەبەستە ئامادەی دیدارن، بەڵام وەزارەتی دەرەوەی ئێران ئەم هەواڵە ڕەت دەکاتەوە و دەڵێت، "هیچ داواکارییەکی لەم شێوەیەمان لە ئەمریکا نەکردووە".

لێدوان فەرمی:  ئیسماعیل بەقائیی، وتەبێژی وەزارەتی دەرەوەی ئێران ڕایگەیاند: تاران تاوەکو ئێستا هیچ داواکارییەکی پێشکەش بە ئەمریکا نەکردووە بۆ ئەوەی دانوستانە ئەتۆمییەکان لەگەڵ ئەمریکا دەست پێبکاتەوە، ئەمەش لە کاتێکدایە کە دۆناڵد ترەمپ، سەرۆکی ئەمریکا ڕایگەیاندبوو، بەرپرسانی ئێران پەیوەندییان بە ئەمریکاوە کردووە بۆ دیاریکردنی وادەیەک بۆ دانوستان لەسەر بەرنامە ئەتۆمییەکەی  ئێران.

لەلایەکی دیکەوە: ستیڤ ویتکۆف، نێردەی دۆناڵد ترەمپ لە ڕۆژهەڵاتی ناوەڕاست ڕایگەیاند، لە هەفتەی داهاتوو  لەگەڵ دیپلۆماتکارانی ئێران کۆدەبێتەوە.