ئەکسیۆس: پووتین داوای لە ئێران کردووە لەگەڵ ئەمریکا بگاتە ڕێککەوتن

ئاڤا نیوز

ماڵپەری ئەکسیۆسی ئەمریکی بڵاویکردەوە، سەرۆکی ڕووسیا داوای لە ئێران کردووە پیتاندنی یۆراینیۆم ڕابگرێت و بگاتە ڕێککەوتن لەگەڵ ئەمریکا.

وێنە گەورەکە: دوای ڕاگرتنی جەنگی نێوان ئیسرائیل و ئێران، هەوڵەکان بۆ گەڕاندنەوەی ئێران بۆ سەر مێزی گفتوگۆ و دانوستان لەگەڵ ئەمریکا بەردەوامە لەبارەی بەرنامە ئەتۆمییەکەی، بەڵام ئەو وڵاتە سورە لەسەر ئەوەی پەرە بە بەرنامە ئەتۆمییەکەی بدات.

زانیاری بەدەستهاتوو: ماڵپەری ئەکسیۆسی ئەمریکی بە پشتبەستن بە سەرچاوەیەکی ئاگادار  بڵاویکردەوە، ڤلادیمێر پووتین، سەرۆکی ڕووسیا داوای لە ئێران کردووە پیتاندنی یۆرانیۆم بۆ ئاستی سفر ڕابگرێت و لەگەڵ ئەمریکا بگاتە ڕێککەوتن.

زانیاریی زیاتر: پووتین لە چەند هەفتەی ڕابردوودا هەڵوێستی خۆی بە دۆناڵد ترەمپ و سەرکردەکانی ئێران گەیاندووە و داوای لە  تاران کردووە بەرەو ڕێککەوتنێک هەنگاو بنێت کە یارمەتیدەر بێت بۆ دەستپێکردنەوەی دانوستانەکان لەگەڵ واشنتن.

بۆچوونی لایەنی بەرامبەر: ماڵپەرەکە ئەوەشی ئاشکرا کردووە بەرپرسانی ئێران ئەم داوایەی پووتینیان ڕەتکردووەتەوە و پێیان ڕاگەیاندووە، پیتاندنی یۆرانیۆمی ئێران جێگای دانوستان نییە.