میدیاکانی ئێران: ئیسرائیل لە هێرشەکانی بۆ سەر ئێران هەوڵی کوشتنی پزیشکیانی داوە

ئاڤا نیوز

میدیاکانی ئێران زانیاریی نوێ لەبارەی هێرش و بۆردومانەکانی ئیسرائیل بۆ سەر ئێران بڵاودەکەنەوە و باس لەوە دەکەن هەوڵی کوشتنی سەرۆککۆماری ئێران دراوە. 

وێنە گەورەکە: دوای 12 ڕۆژ لە جەنگی نێوان ئێران و ئیسرائیل، لایەنی ئێران وردەکاری و زانیاریی نوێ لەبارەی هێرشەکانی ئیسرائیل بۆ سەر وڵاتەکەی ئاشکرا دەکات. 

ڕاگەیێنراوی فەرمی: مەهدی تەباتەبایی، جێگری بەرپرسی نووسینگەی سەرۆککۆماری ئێران، لە چاوپێکەوتنێکی میدیایدا ڕایگەیاند، ئیسرائیل کۆبوونەوەی بەرپرسانی باڵای وڵاتی ئێران لەماوەی جەنگی 12 ڕۆژەدا بە ئامانجگرتووە و مەسعوود پزیشکیان ڕزگاری بووە، توانیویەتی لە ڕێگەی بەکارهێنانی فریاگوزاریی خێراوە لەگەڵ ژمارەیەک بەرپرسی دیکە ڕزگاری ببێت بەڵام قاچی برینداربووە. 

لەلایەکی دیکەوە: میدیای سوپای پاسداران باسی لەوەکردووە، ئیسرائیل هاوشێوەی پیلانی کوشتنی حەسەن نەسروڵڵا، هێرشی کردووەتە سەر باڵەخانەی ئەنجوومەنی باڵای ئاسایشی ئێران و ئەندامانی ئەنجوومەنەکە لە ڕێگەی بەکارهێنانی ڕێڕەوی فریاگوزاریی خێراوە ڕزگاریان بووە. 

ئەمەش بزانە: هەفتەی ڕابردوو مەسعوود پزیشکیان، لە چاوپێكەوتنێکی تایبەت دا لەگەڵ ڕۆژنامەنووسی ئەمریکی تاکەر کارلسۆن، ئەنجامدا و ڕایگەیاند: ئیسرائیل هەوڵی کوشتنی منی داوە و ئەمریکا لە پشتی ئەو کردەوەیە نەبووە.