پەرلەمانتارێكی عێراقی داوا دەکات فریایی زەوییە کشتوکاڵییەکانی مەدائین بکەون

ئاڤا نیوز

پەرلەمانتارێکی عێراق، هەژموونی گرووپە چەکدارەکانی بەسەر هەردوو  قەزای مەدائین و نەهرەوان لە پارێزگای بەغدا ئاشکرا کرد و دەڵێت: " چەند گرووپێکی چەکدار بەناوی بەرەی مقاوەمە دەستیان بەسەر زەوییە کشتوکاڵییەکانی ئەو دوو ناوچەیە گرتووە".

چیرۆکی سەرەکی: قەزای مەدائن و ناحییەی نەهرەوان دوو ناوچەی سوننەنشینی دەرووبەری پارێزگای بەغدان و بە سەبەتەی خۆراکی ناوەڕاست ناسراون، چونکە پانتاییەکی گەورەی زەوی کشتوکاڵییان هەیە.

لێدوانی فەرمی: کازم شەممەری، پەرلەمانتار لەپشکی قەزای مەدائین ڕایگەیاند: نزیکەی 80 جووتیار ناچار کراون دەستبەرداری زەوییەکانیان بن بەپێچەوانەوە ڕووبەڕووی گرووپی دڵڕەق و بێبەزەیی ببنەوە. 

زانیاریی زیاتر: شەممەری ئاماژەی بەوەکرد ئەم هەڕەشانە لە ڕێگەی چەندین چەکدار کە  ئۆتۆمبێلی جۆری تاهۆ بەکاردەهێنن و بەڕۆژی ڕووناک فشار لە  جووتیار دەکەن واز لە زەوییەکانیان بهێنن.

ئەوەی پیویستە بیزانیت: ئەو پەرلەمانتارە ئەوەشی ڕوونکردەوە، کە فەرمانگەیەکی فەرمی لە مەدائین پشتیوانیی ئەو گرووپانە دەکات کە دەست بەسەر زەویی جووتیاران دەگرن و وتی" من ئامادەم لە بەردەم لایەنێکی حکومیدا ناوی ئەو فەرمانگە فەرمییە ئاشکرا بکەم کە تێوەگلاوە."