لە ئەفغانستان خۆپیشاندان لە دژی تاڵیبان بەڕێوە دەچێت

ئاڤا نیوز

لە چەند شارۆچکەیەکی ئەفغانستان، خۆپیشاندان لە دژی تاڵیبان بەڕێوە چوون و بە هۆی گرژییەکانیشەوە تا ئێستا لانیکەم دوو خۆپیشاندەر کوژراون و کەسێکیش بریندار بووە.

وێنە گەورەکە: بەڕێوەچوونی خۆپیشاندان لە ئەفغانستان لە دژی تاڵیبان کەم وێنەیە. بەڵام بۆ چەند ڕۆژی یەک لەدوای یەک لە شارۆچکەکانی دەرایم و ئەرگۆ لە ویلایەتی بەدەخشانی ئەفغانستان خۆپیشاندان بەڕێوە دەچێت.

زانیاریی بەدەستهاتوو: هۆکاری سەرەکیی سەرهەڵدانی ئەم خۆپیشاندانانە کوژرانی جوتیارێکە بە دەستی هێزەکانی تاڵیبان لە گوندێکی نزیک شارۆچکەی دەرایم. کاتێک هێزەکانی تاڵیبان ویستوویانە کێلگەی ماددەی هۆشبەری جۆری خەشخاشی جووتیارێک تێکبدەن ڕووبەڕووبوونەوە ڕوویداوە و جوتیارەکە کوژراوە. 

ئەوەی پێویستە بیزانیت: خۆپیشاندەران دژی بەکاربردنی تووندوتیژی و بەزاندنی سنووری کەسیی خەڵکن لەلایەن هێزەکانی تاڵیبانەوە.