پەرلەمانی عێراق ڕۆژی شەممە بۆ هەڵبژاردنی سەرۆكەكەی كۆدەبێتەوە

ئاڤا نیوز  

پەرلەمانی عێراق ڕۆژی شەممە کۆدەبێتەوە، یەکێک لە بڕگەکانی کارنامەی دانیشتنەکە هەڵبژاردنی سەرۆکی پەرلەمان دەبێت.

وێنە گەورەكە: دوای چوار جار هەوڵدان بۆ هەڵبژاردنی سەرۆکی پەرلەمانی عێراق لە ماوەی شەش مانگی ڕابردوو، هێشتا جێگرەوەی حەلبووسی دیاری نەکراوە.

ڕاگەیێنراوی فەرمی: نووسینگەی ڕاگەیاندنی پەرلەمانی عێراق کارنامەی دانیشتنی ڕۆژی شەممە 18-5-2024 بڵاوکردەوە، کە سێ بڕگە لەخۆ دەگرێت.

زانیاریی زیاتر: بەپێی کارنامەکە خوێندنەوەی دووەم بۆ پڕۆژە یاسای پشووە فەرمییەکان، هاوکات خوێندنەوەی دووەم بۆ پێشنیازە یاسای هەمواری دووەمی یاسای کۆمیسیۆنی باڵای هەڵبژاردنەکان دەکرێت و بڕگەی سێیەمی تایبەتە بە هەڵبژاردنی سەرۆکی پەرلەمان.

ئەوەی پێویستە بیزانیت: ئێستا لایەنە سوننییەکان دوو بەربژێریان هەیە "سالم عیساوی" و "مەحموود مەشهەدانی" سێ لایەنە سوننەکە پشتیوانی لە "سالم عیساوی" دەکەن، لە بەرامبەریشدا هاوپەیمانی تەقەدووم بە فەرمی پشتیوانی خۆی بۆ "مەحموود مەشهەدانی" ڕاگەیاندووە. بەڵام دەنگی لایەنە کوردی و شیعەکان یەکلایی دەکاتەوە کامەیان دەنگی پێویست دەهێنێت.