حکومەتی عێراق 2%ـی پارەی گەنمی جووتیاران دەبڕێت

ئاڤا نیوز

 

وەزارەتی بارزگانی و پیشەسازی حکومەتی عێراق، 2%ـی پارەی گەنمی جووتیاران بە بیانووی دابینکردنی بنەتۆ و ماددەی قڕکەر دەبڕێت، ئەمەش ناڕەزایی جووتیارانی لێدەکەوێتەوە.

 

وێنە گەورەکە: حکومەتی عێراق بۆ ئەمساڵ 700 هەزار تۆن گەنمی لە هەرێمی کوردستان وەرگرت، بۆ هەر تۆنێک گەنمیش بڕی 850 هەزار دیناری دابین کرد. 

 

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی پیشەسازی و بازرگانی حکومەتی هەرێمی کوردستان، بە ئاڤا نیوزی ڕاگەیاند: زۆرینەی ئەو جووتیارانەی چەکی پارەی گەنمیان وەرگرتووە، 2%ـی پارەکەیان لێبڕاوە، واتە بۆ هەر تۆنێک گەنم 25 تاوەکو 30 هەزار دینار.

 

زانیاریی زیاتر: وەزارەتی بازرگانی و پیشەسازی عێراق، هۆکاری لێبڕینی ئەو بڕە پارەیە بۆ دابینکردنی بنەتۆی گەنم و ماددەی کیمیایی دەگەڕێنێتەوە، دواتر بودجەیەک دابین دەکات و  لە ڕێگەی وەزارەتی کشتوکاڵی هەرێمی کوردستانەوە بنەتۆ و ماددەی کیمیایی دەکڕدرێت.

 

قوڵتر: ئەو جووتیارانەی پارەیان لێبڕاوە لەم بڕیارە ناڕازین، باس لەوە دەکەن کە بڕی لێبڕینەکە زۆرە و بەشێکیشیان بنەتۆیان پێنەدراوە.

 

ئەوەی پێویستە بیزانیت: وەزارەتی بازرگانی و پیشەسازی حکومەتی عێراق لە دابینکردنی بنەتۆ و ماددەی کیمیایی بۆ جووتیاران بەرپرسە، چونکە ئەو لێبڕینی لە پارەی گەنمی جووتیاران کردووە. 

 

ئەمەش بزانە: هەر جووتیارێک بەگوێرەی ڕووبەری زەوییەکەی بنەتۆی بۆ دابین دەکرێت.