ئەمریکا زۆرینەی هاوکارییە دەرەکییەکانی ڕادەگرێت

ئاڤا نیوز

 

مارکۆ ڕۆبیۆ، وەزیری دەرەوەی ئەمریکا، فەرمانێکی بۆ ڕاگرتنی دەستبەجێی نزیکەی هەموو هاوکارییە دەرەکییەکانی ئەمریکا دەرکرد، هاوکات تەنیا دوو وڵات فەرمانی ڕاگرتنەکە نایانگرێتەوە.

 

وێنە گەورەکە: فەرمانە کارگێڕییەکە بۆ سەرجەم پۆستە کۆنسوڵی و دیپلۆماسییەکان نێردراوە و دوای ئەوە هاتووە کە دۆناڵد ترەمپ، سەرۆکی ئەمریکا، فەرمانێکی جێبەجێکاری بۆ وەستاندنی هەموو ئەرک و خەرجییەکی نوێی یارمەتیی دەرەکیی دەرکرد.

 

زانیاریی زیاتر: بەگوێرەی فەرمانەکە وەزارەت و ئاژانس و دامەزراوەکانی ئەمریکا بۆیان نییە یارمەتیی و هاوکاری دابین بکەن یان لە ڕێگەی پڕۆگرامی (USAID)ـەوە کار بکەن، بە بێ ئەوەی ڕەزامەندیی وەزارەتی دەرەوە بۆ ئەو یارمەتیدانە وەربگرن. مەبەست لەم ڕاگرتنە پێداچوونەوە و ڕێکخستنەوەی یارمەتییە دەرەکییەکانی ئەمریکایە لە ماوەی 90 ڕۆژدا.

 

ئەوەی پێویستە بیزانیت: لەم فەرمانەدا چاوپۆشی تەنیا لە یارمەتییە داراییەکان بۆ هەریەکە لە ئیسرائیل و میسر کراوە و ناوی هیچ وڵاتێکی دیکە نەبراوە.

 

ئەمەش بزانە: ئەمریکا ساڵانە نزیکەی 3.3 ملیار دۆلار هاوکاریی ئیسرائیل و 1.5 ملیار دۆلار هاوکاریی میسر دەکات.