سەركردەكانی حەماس لە سەر ئاگربەست بۆچوونی جیاوازیان هەیە

ئاڤا نیوز

لە كاتێكدا هەوڵە نێودەوڵەتییەكان بۆ گەیشتن بە ئاگربەست لە غەززە بەردەوامن، باس لەوە دەكرێت كە جیاوازیی جددی لە نێوان سەركردەكانی حەماس لە سەر ئاگربەست هەیە. 

وێنە گەورەكە: ڕۆژنامەی وۆڵ ستریت جۆرناڵی ئەمریكی ئاشكرایكردووە: یەحەیا سەنوار، سەركردەی حەماس لە غەززە لەگەڵ ئیسماعیل هەنیە، بەرپرسی مەكتەبی سیاسیی لە دەرەوەی وڵات، جیاوازیی جددی لە بۆچوونیان سەبارەت بە مەرج و داواكارییەكانی تایبەت بە ئازادكردنی بارمتە ئیسرائیلییەكان هەیە. 

ئەوەی پێویستە بیزانیت: هەڵوێستی سەنوار تووندترە و دەیەوێت لە بەرامبەر ئازادكردنی بارمتەكاندا ئیمتیازی زیاتر لە ئیسرائیل وەربگرن، وەك گەیشتن بە ئاگربەستێكی هەمیشەیی و كشانەوەی هێزەكانی ئیسرائیل لە غەززە. بەڵام هەنیە كە لە گفتوگۆكاندا بەشدارە، نەرمیی زیاتر دەنوێنێت و بەوەندە ڕازییە كە ئاگربەستێكی شەش هەفتەیی بێتە ئاراوە و لەو ماوەیەدا پرسی كشانەوەی هێزەكانی ئیسرائیل باس بكرێت. 

زانیاریی زیاتر: لە گفتوگۆكانی ئاگربەستدا بڕیاری كۆتایی حەماس لای یەحیا سەنوارە؛ تا ئێستاش گفتوگۆكان بە ئەنجام نەگەیشتوون، لەكاتێكدا تەنیا چەند ڕۆژێكی كەم بۆ هاتنی مانگی ڕەمەزان ماوە و تا دێت ئومێدەكان بۆ گەیشتن بە ئاگربەست بەر لە دەستپێكی ڕەمەزان كەمتر دەبنەوە.