ڕووسیا: هیوادارین بەرەوپێشچوون لە دانوستانەکانی سعوودیە هەبێت

 

ئاڤا نیوز

ڕۆژی دووشەممە، شاندی ئۆکراینا و ڕووسیا لە سعوودیە بەجیا دانوستانەکانیان بۆ ڕاگەیاندنی ئاگربەست لەگەڵ ئەمریکا دەستپێدەکەنەوە، و ڕووسیا دەڵێت، هیوادارین لە دانوستانەکان بەرەوپێشچوون بێتە ئاراوە.

چیرۆکی سەرەکی: مۆسکۆ پێشنیازی هاوبەشی ئەمریکا و ئۆکراینای بۆ ئاگربەستی تەواو و بێ مەرج بۆ ماوەی 30 ڕۆژ ڕەتکردەوە، لەبری ئەوە پێشنیازی تەنها ڕاگرتنی هێرشە ئاسمانییەکان بۆ سەر دامەزراوەکانی وزە کرد و لەلایەن ئەمریکا و ئۆکراینا قبووڵکرا.

لێدوانی فەرمی: گریگۆری کاراسین، سیناتۆری ڕووسیا کە سەرۆکایەتی شاندی ڕووسیا دەکات، ڕایگەیاند، هیوادارین لانیکەم هەندێک بەرەوپێشچوون لە دانوستانەکانی سعوودیە  بێتە ئاراوە.

بۆچوونی لایەنی بەرامبەر: بەرپرسێکی باڵای ئۆکراینا ڕۆژێک پێشتر بە ئاژانسی فرانس پرێسی ڕاگەیاندبوو، کیێڤ هیوادارە لانیکەم لەسەر ئاگربەستێکی سنووردار ڕێککەوتن دەستەبەر بکات.

ئەوەی ئێستا ڕوودەدات: هەریەکە لە ئۆکراینا و ڕووسیا بەردەوامن لە هێرشەکانیان بۆ سەر ناوچەکانی یەکتر و تەنیا لە ناوچەکانی بەرهەمهێنانی وزە ڕووبەڕووبوونەوەکان وەستێندراوە.