ئاگرکەوتنەوە لە وڵاتانی ئەوروپا ڕیکۆردێکی نوێ تۆمار دەکات

ئاڤا نیوز

بەپێی شیکارییەکی ئاژانسی فرانس پرێس لە ساڵی 2025دا تا ئێستا زیاتر لە یەک ملیۆن هێکتار زەوی لە وڵاتانی ئەوروپا بەهۆی ئاگرکەوتنەوە سووتاون، ئەمەش ژمارەیەکی پێوانەییە لەوەتەی ساڵی 2006ەوە.

وێنە گەورەکە: تا نیوەڕۆی ڕۆژی پێنجشەممە یەک ملیۆن و 15 هەزار و 731 هێکتار زەوی لە ئەوروپا سووتاون، ئەم ڕووبەڕەش گەورەترە لە ڕووبەری وڵاتی قوبرس، بەمەش ڕیکۆردەکەی ساڵی 2017ی شکاندووە کە لەو کاتەدا 988 هەزار و 524 هێکتار زەوی بەهۆی ئاگرکەوتنەوە سووتا بوون.

ئەوەی ئێستا ڕوودەدات: هێشتا ئاگرکەوتنەوەکان لە ئیسپانیا و پورتوگال بەردەوامن و هەریەکە لە ئەڵمانیا، ئیسپانیا، قوبرس و سلۆڤاکیا بەهۆی ئاگرکەوتنەوە خراپترین ساڵیان لە ماوەی دوو دەیەی ڕابردوودا بەڕێکردووە.

ئەوەی پێویستە بیزانیت: ئیسپانیا بە شێوەیەکی بەرچاو زۆرترین زیانی بەرکەوتووە کە زیاتر لە 400 هەزار هێکتار زەوی سووتاوە و ئەمەش نزیکەی 40%ی کۆی گشتیی ڕووبەری سووتاوی یەکێتی ئەوروپا پێکدەهێنێت. لە پورتوگالیش نزیکەی 274 هەزار هێکتار زەوی سووتاوە کە ئەمەش گەورەترین ڕووبەرە لە مێژووی ئەو وڵاتەدا تا 21ی مانگی هەشت تۆمار کرابێت و دوای ئەوان، ڕۆمانیا بە 126 هەزار هێکتار و فەرەنسا بە 35 هەزار و 600 هێکتار دێن.