ئەمریكا هێز بۆ ڕۆژهەڵاتی ناوەڕاست دەجوڵێنێت

ئاڤا نیوز

ئەمریكا لەگەڵ زیادبوونی گرژییەكانی ڕۆژهەڵاتی ناوەڕاست هێزی دیكەی ڕەوانەی ڕۆژهەڵاتی ناوەڕاست كردووە، ئەوەش لەكاتێكدایە حیزبوڵڵا دەیان مووشەكی ئاڕاستەی ئیسرائیل كرد و  ئێرانیش هەڕەشەكانی بۆسەر ئیسرائیل زیاتر كردووە.

وێنە گەورەكە: گرژییەكانی ڕۆژهەڵاتی ناوەڕاست زیاتربوون، ئێران لەتۆڵەی بە ئامانجگرتنی كونسوڵخانەكەی لە سووریا، هەڕەشەی هێرشی ڕاستەوخۆ بۆسەر ئیسرائیل دەكات.

ڕاگەیێنراوی فەرمی: وەزارەتی بەرگریی ئەمریكا "پێنتاگۆن" ڕایگەیاند: هێزی دیكەی سەربازی و چەكی پێویست ڕەوانەی ڕۆژهەڵاتی ناوەڕاست كردووە، ئەویش لەگەڵ زیادبوونی مەترسی هێرشی ئێران بۆسەر ئیسرائیل.

لەلایەكی دیكەوە: بەرپرسێكی باڵای سەربازی ئەمریكا گوتویەتی: "ئێمە هێز و چەكی زیاترمان ناردووەتە ناوچەكە بۆ ئەوەی توانای بەرپەرچدانەوە و پاراستنی هێزەكانی ئەمریكا زیاتر بكەین".بە گوێرەی هەواڵی میدیاكان، سوپای ئەمریكا، 12 فڕۆكەی ئێف ـ 15ی لە بەریتانیاوە گواستەوە ڕۆژهەڵاتی نێوەڕاست.

گۆشەیەكی دیكە: لێدوانی ئەمریكا لەبارەی ناردنی هێز و چەكی زیاتر بۆ ڕۆژهەڵاتی ناوەڕاست لەكاتێكدایە، ئەمشەو هەینی حیزبوڵڵای لوبنان لە باشووری لوبنانەوە دەیان مووشەكی ئاڕاستەی باكووری ئیسرائیل كرد، بەڵام هێرشەكە هیچ زیانێكی گیانی نەبووە.

باكگراوند: دووشەممەی ڕابردوو، ئیسرائیل بۆردوومانی كونسوڵخانەی ئێرانی لە دیمەشقی پایتەختی سووریا كرد، بەهۆیەوە حەوت بەرپرسی سەربازی و دیپلۆماتكاری ئێران كوژران.