ئیسرائیل دەیەوێت دانیشتووانی ڕەفەح ئاوارەی میسر ببن

ئاڤا نیوز

ئیسرائیل سوورە لەسەر ئەنجامدانی هێرش بۆ سەر ناوچەی ڕەفەح لە فەڵەستین، میسریش نیگەرانە لەوەی ئیسرائیل دەیەوێت دانیشتووانی ئەو ناوچەیە ئاوارەی وڵاتەكەی ببن.

چیرۆكی سەرەكی: ژمارەیەک بەرپرسی باڵای هەواڵگری و سەربازیی ئیسرائیل لە قاهیرە بە نهێنی لەگەڵ بەرپرسی ئاژانسی هەواڵگریی میسر و ژمارەیەک بەرپرسی باڵای دیکەی ئەو وڵاتە کۆبوونەتەوە، گفتوگۆیان لە سەر هێرشی چاوەڕوانکراوی ئیسرائیل بۆ سەر ڕەفەح کردووە. 

وێنە گەورەکە: سەرەڕای هۆشدارییە نێودەوڵەتییەکان لە کەوتنەوەی کارەساتێکی مرۆیی گەورە، ئیسرائیل لە سەر ئەنجامدانی هێرشی زەمینی بۆ سەر ڕەفەح پێداگرە. 

بۆچی گرنگە: میسر نیگەرانە لەوەی هێرشی ئیسرائیل بۆ سەر ڕەفەح پاڵ بە دانیشتوانی کەرتی غەززەوە بنێت سنوورەکانی ببەزێنن و ئاوارەی ئەو وڵاتە ببن.

ئەوەی پێویستە بیزانیت: بەرپرسانی میسر پێشتر ڕایانگەیاندبوو، هێرشی سەر ڕەفەح زیان بە پەیوەندییەکانی نێوان میسر و ئیسرائیل دەگەیێنێت.