عێراق: ڕووسیا 32 هاووڵاتیی خۆی لە کەمپی هۆل دەگەڕێنێتەوە وڵاتەکەی

ئاڤا نیوز

 

ڕاوێژکاری ئاسایشی نیشتمانیی عێراق ڕایدەگەیێنێت، ڕووسیا 32 هاووڵاتیی خۆی لە کەمپی هۆلەوە گەڕاندووەتەوە وڵاتەکەی و داوا لە وڵاتانی دیکەش دەکات، هاووڵاتیانی خۆیان لە کەمپە بگەڕێننەوە.

 

ڕاگەیێنراوی فەرمی: قاسم ئەعرەجی، ڕاوێژکاری ئاسایشی نیشتمانیی عێراق لە تۆڕی کۆمەڵایەتی "X" نووسیویەتی: "دوای هەوڵە بەردەوامەکانی عێراق، 24 وڵات دەستیان بە پرۆسەی گەڕاندنەوەی هاووڵاتییەکانیان کردووە لە نێویاندا ڕووسیا، کە لەم دواییانەدا 32 منداڵ، 12 کچ و 20 کوڕ کە تەمەنیان لە نێوان پێنج بۆ 17 ساڵان دەبوو گەڕاندووەتەوە وڵاتەکەی".

 

زانیاریی زیاتر: ئەعرەجی سوپاسی هەڵوێستی حکومەتی ڕووسیا دەکات و داوا لە وڵاتانی دیکەش دەکات، هاووڵاتییەکانیان بگەڕێننەوە وڵاتەکانیان وەک ئامادەکارییەک بۆ داخستنی کەمپەکە.

 

ئەمەش بزانە: کەمپی هۆل دەکەوێتە پارێزگای حەسەکەی ڕۆژئاوای کوردستان، خێزانی چەکدارانی داعشی لە 60 وڵاتەوە تێدا نیشتەجێن، عێراق تاوەکو ئێستا 2268 خێزانی عێراقی کە ژمارەیان 8881 کەسە لە کەمپی هۆلەوە گەڕاندووەتەوە و لە کەمپی جەدعەی دەشتی نەینەوا نیشتەجێی کردوون.