ئەڵمانیا دەست بە سەر 35 تۆن ماددەی هۆشبەردا دەگرێت

ئاڤا نیوز

لێکۆڵەرەوانی ئەمنیی ئەڵمانیا دەستیان بە سەر 35.5 تۆن ماددەی هۆشبەر لە جۆری کۆاکاییندا گرت، کە بەهاکەی نزیکەی 2.8 ملیار دۆلار دەبێت.

ئەوەی پێویستە بیزانیت: نزیکەی 24.5 تۆنی لە هامبۆرگ دەستی بەسەردا گیراوە و هەشت تۆنی دیکەش لە بەندەری ڕۆتەردام و سێ تۆنیش لە گوایاکویل لە ئیکوادۆر. ماددە هۆشبەرەکە لە ناو نۆ کۆنتەینەردا بووە و لە نێوان باری میوە و کەرەستەی دیکەی یاساییدا شاردرابوویەوە.

زانیاریی زیاتر: جگە لە ماددە هۆشبەرەکە، پۆلیس دەستی بە سەر ژمارەیەک مۆبایل و لاپتۆپ و هەروەها چەند قاڵبێکی زێڕ، 23 هەزار یۆرۆ و ئۆتۆمۆبێلێکی جۆری پۆرشدا گرتووە کە نرخەکەی نزیکەی 250 هەزار یۆرۆ دەبێت.

ئەمەش بزانە: ئۆپەراسیۆنەکە لە نێوان مانگی نیسان و سێپتەمبەری ساڵی ڕابردوو بووە. قاچاخچییەکان هەشت کەس بوون؛ دوو ئەڵمانی، دوو تورک و ئەوانی دیکەش خەڵکی ئازەربایجان، بولگاریا، مەغریب و ئۆکراینا بوون. حەوت کەسیان لە کۆتایی ئایار و سەرەتای حوزەیرانی ئەمساڵ لە ئەڵمانیا دەستگیر کراون.