پێشبینی سیمپسۆنەکان بۆ هەڵبژاردنی ئەمریکا شكستی هێنا

ئاڤا نیوز

زنجیرە فیلمی ئەنیمەیشنی بەناوبانگی "The Simpsons" پێشبینی کردبوو کامالا هاریس دەبێتە سەرۆکی ئەمریکا، بەڵام نەهاتەدی و دۆناڵد ترەمپ سەرکەوت.

وێنە گەورەکە: ماوەی 35 ساڵە زنجیرەکە بە پێشبینییە وردەکانی بۆ زۆرێک لە ڕووداوەکانی داهاتوو ناسراوە، لە یەکێک لە ئەڵقەکانیدا پێشبینی کردبوو ژنێک ببێتە سەرۆکی ئەمریکا کە هاوشێوەی کامالا هاریسە.

ئەوەی پێویستە بیزانیت: لە ئەڵقەی "Bart to the Future" کە لە ساڵی 2000 پەخش کرا، کارەکتەری لیزا سیمپسۆن كە جلێکی وەنەوشەیی له‌به‌ردایه‌، کاروباری کۆشکی سپی بەڕێوەدەبات و بە کامالا هاریس بەراورد دەکرێت کە جلەکانی هاوشێوەی جلی کامالا هاریسـە، لەکاتی دەستبەکاربوونیدا وەکو جێگری سەرۆکی ئەمریکا لە ساڵی 2021.

زانیاریی زیاتر: دوای ئەوەی هاریس لە هەڵبژاردنی ئەمساڵدا شکستی هێنا، لە تۆڕە کۆمەڵایەتییەکان دەگوترێت: "ئەمە یەکەمجارە خێزانی سیمپسۆنەکان لە پێشبینییەکاندا شکستیانهێنا و نەیانتوانی پێشبینی داهاتوو بکەن".

ئەمەش بزانە: زنجیرەی “Simpsons” بەناوبانگ بوو بە پێشبینییە ڕاستەکانی، لەوانە پشێوییەکانی بەردەم کۆنگریسی ئەمریکا، کۆتاییهاتنی زنجیرەی “Game of Thrones”، ڤایرۆسی کۆرۆنا، کڕینی کۆمپانیای دیزنی لە 20th Century Fox و بڵاوبوونەوەی ئیبۆلا و دروستبوونی کاتژمێری زیرەک و گەندەڵیی فیفا.