بەرپرسێكی ئەمریكا بەهۆی ناڕەزایی بەرامبەر دۆخی غەززە دەست لەكار دەكێشێتەوە

ئاڤا نیوز 

ئەندرۆ میلەر جێگری یاریدەدەری وەزیری دەرەوەی ئەمریکا بۆ کاروباری ئیسرائیل و فەڵەستین، نامەی دەستلەکارکێشانەوەی خۆی پێشکەش کرد، دوای ئەوەی باوەشەکەی نەتەنیاهۆ و بایدنی بە "باوەشی ورچ" ناوبرد.

وێنە گەورەکە: دەستلەکارکێشانەوەی میلەر لە کاتێکدایە، ناڕەزایەتییەکان لە ناوخۆ و دەرەوەی حکومەتی ئەمریکا لەسەر بەردەوامیی شەڕ لە غەززە پەرەی سەندووە، میلەر بووەتە باڵاترین بەرپرسی ئەمریکا لە دوای دەستپێکردنی شەڕی غەززە لە مانگی ئۆکتۆبەری ساڵی ڕابردووەوە پۆستەکەی بەجێبهێڵێت.

هۆکارە زانراوەکان: هەرچەندە میلەر ڕۆژی هەینی بە هاوکارەکانی ڕاگەیاندووە، کارەکەی بەجێهێشتووە بۆ ئەوەی کاتێکی زیاتر لەگەڵ خێزانەکەی بەسەر ببات، بەڵام لە ڕاپۆرتێكی واشنتن پۆست دا هاتووە:" بڕیارەکەی وەک ناڕەزایەتییەک بووە بەرامبەر ڕێگەپێدانی ئەمریكا بۆ ئیسرائیل كە بەهۆیەوە دەیان هەزار فەڵەستینی كوژراون".

باکگراوند: میلەرڕاوێژکاری سیاسی باڵیۆزی ئەمریکا بووە لە نەتەوە یەکگرتووەکان، لە سەردەمی ئیدارەی باراک ئۆبامای سەرۆکی پێشووی ئەمریکاشدا وەک بەڕێوەبەری پرسە سەربازییەکانی میسر و ئیسرائیل لە ئەنجوومەنی ئاسایشی نیشتمانیدا لە کۆشکی سپی کاری کردووە.