بەهۆی لافاو شەقامەكانی بەغدا ژێرئاوكەوتن و دەیان ئۆتۆمبێل زیانی بەرکەوت

ئاڤا نیوز

 

شەوی ڕابردوو شەپۆڵێكی بارانبارینی چڕ شاری بەغدای گرتەوە و بەهۆیەوە لافاو لە شەقام و كۆڵەكانەكان دروستبوو، ژمارەیەك ئۆتۆمبێلی هاووڵاتیان ژێرئاوكەوتن.

 

وێنە گەورەكە: شەپۆڵی نزمەپاڵەپەستۆی دەریای سپی ناوەڕاست ڕووی لە عێراق كردووە كە بەهۆیەوە بارانبارین پارێزگاكانی ناوەڕاست و خوارووی عێراقی گرتووەتەوە، تا دەگاتە ناوچەكانی ئیدارەی گەرمیانیش. شەپۆڵەكە شاری بەغدای بەشێوەیەكی چڕتر گرتووەتەوە بەراورد بە ناوچەكانی دیكە. هاوكات ڕێژەی شێ بەرزبووەتەوە.

 

ڕاگەیێنراوی فەرمی: بەپێی خشتەی كەشناسیی عێراق، لەماوەی 24 كاتژمێری ڕابردوودا بڕی بارانبارین لە شاری بەغدا 72 ملم بووە كە زۆرترین ڕێژەی بارانبارینی تۆماركراوە بەراورد بەناوچەكانی دیكەی عێراق، هەروەها زۆرترین ڕێژەی بارانبارینە كە ئەمساڵ تۆماركرابێت.

 

چی ڕوویدا: زۆربەی شەقام و كۆڵانەكانی پایتەختی عێراق ژێرئاو كەوتن، تیمەكانی شارەوانی و بەرگریی شارستانی لەڕێگەی ئەمانەی بەغداوە، لە شەوی ڕابردووەوە سەرقاڵی كردنەوەی ئاوەڕۆی شەقامەكانن، هاوكات لەڕێگەی تەنكەرەوە ئاوی باران ڕادەكێشن. ئەمانەی بەغدا دەڵێت، هۆكاری دروستبوونی لافاوەكە، بارینی بارانێكی زۆر بووە لە ماوەیەكی كورتدا، بێ ئەوەی وردەكاری زیانە ماددییەكان ئاشكرا بكات.

 

لێكەوت و زیانەكان: بەهۆی پەنگخواردنەوەی ئاو، جووڵەی هاتووچۆی ئۆتۆمبێل لە شەقامەكان پەكی كەوتووە، هاوكات پرۆژەكانی ئەندەرپاس و ئۆڤەرپاس كە ئێستا لە شاری بەغدا لەژێر جێبەجێكردندان و تەواو نەكراون.

 

ئەوەی پێشبینی دەكرێت: دەستەی گشتیی کەشناسی و بوومەلەرزەزانیی عێراق هۆشداری دەدات لە بەرزبوونەوەی ڕاددەی شێ و كەمبوونەوەی ئاستی بینین، هەروەها هۆشداریش دەدات لە هاتنی شەپۆڵی خۆڵبارین و بارانی پچڕ پچڕ بەهۆی زیادبوونی خێرایی باوە لە بەشی باشووری ڕۆژئاوای عێراق.