نەورەسە نەخۆشەكان كەرەنتینە دەكرێن

ئاڤا نیوز

 

دوای ئەوەی ژمارەیەک باڵندەی نەورەس لە دەریاچەی دووکان بەهۆی ڤایرۆسێکەوە مردار بوونەوە، پۆلیسی دارستان و ژینگەی ڕاپەڕین بڕیاری جیاکردنەوەی نەورەسەکانی داوە و چاودێرییان دەکات.

چیرۆکی سەرەکی: بەهۆی گۆڕانکاریی کەشوهەواوە کۆمەڵێک باڵندەی کێوی لە جۆری نەورەس لەسەر زێی بچووک تووشی نەخۆشییەکی تایبەت بوون، لە ئەنجامی پشکنینەکان دەرکەوتووە کە نەخۆشییەکە بە هۆی ڤایرۆسێکەوەیە.

ڕاگەیێنراوی فەرمی: بەڕێوەبەرایەتیی پۆلیسی دارستان و ژینگەی ڕاپەڕین ڕایگه‌یاند: دوای ئەو گۆڕانکارییانەی کەشوهەوای هەرێمی گرتەوە، کۆمەڵێک باڵندەی کێوی لە جۆری (نەورەس) لەسەر زێی بچووک تووشی نەخۆشی بوون، دوای ئەوەی پشکنینیان بۆ ئەو باڵندانە کردووە، بڕیاریان داوە باڵندە نەخۆشەکان لەوانی تر جیا بکرێنەوە و  چاودێری و چارەسەریان بکەن. لە ئەنجامی پشکنینەکانیش دەرکەوتووە کە نەخۆشییەکە بە هۆی ڤایرۆسەوەیە.

وێنە گەورەکە: هەفتەی ڕابردوو شەپۆلێکی چڕی باران و تەرزە ناوچەکانی هەرێمی کوردستانی گرتەوە، بەهۆیەوە زیان بەر زەوییە کشتوکاڵییەکان و زیندەوەران کەوت.

زانیاریی بەدەستهاتوو: نەورەسەکانی دەریاچەی دووکان و دەربەندی ڕانیەش بە هەمان شێوە دووچاری لەناوچوون بوونەتەوە.

باکگراوند: باڵندەی نەورەس ماوەی پێنج بۆ 15 ساڵ دەژین و خواردنیان زیندەوەرە ئاوییەکان و ماسی بچووکە.